गजल

गजलकार:- थापा मिरा

मेरो भाई जंगलबाट आको छ कि छैन आमा?

तिम्रो आशीष सीरमाथी लाको छ कि छैन आमा??

गरिबीले हुत्याएर समुन्द्र यो काटी आएँ!

बर्खामास चुहिने घर छाको छ कि छैन आमा??

बगैंचामा सुपारी र नरीवल रोपी आ'थेँ!

बढेर त्यो फल्ने बेला भाको छ कि छैन आमा??

सपनीमा बेसीखेत पहिरोले पुर्दै थियो!
झरी,बादल खेप्दै खेती धाको छ कि छैन आमा??

कस्तो छ नि मेरा बूढा बाबालाई आजभोलि??

ढिँडो,आँटो पेटभरी खाको छ कि छैन आमा??